‘Dis nou anders’

Beeld het besoek afgelê by pensioentrekkers en ander inwoners van die woonbuurte Vrededorp (onder inwoners bekend as Fietas) en Jan Hofmeyr (Jan Bom) in Johannesburg.Die meeste is werkloos of ontvang ’n karige staatspensioen. Nelius Rademan het die foto’s geneem.

Alet Parsons (61) het pas in haar kamer ingetrek. Sy moes reeds in Oktober ingetrek het, maar die mure was donker geverf en haar voordeur kon nie sluit nie. Sy het self betaal om die mure wit te laat verf en die voordeur reg te maak. Van die vensters is nog stukkend en die balkondeur en veiligheidshek kan ook nie sluit nie. “Toe ek die eerste keer hier aankom, het ek sommer begin huil en uitgehardloop,” sê sy. “Jy kry nie baie geld nie, dan moet jy dié betaal en daai betaal (om reg te maak). Dan het jy nie geld vir kos nie. Ek ken nie die mense hier nie en ek wil nie vra nie; jy het jou trots.” Parsons het voorheen by haar dogter in Johannesburg gebly en na haar kleinkinders gekyk. Sy het nog ’n dogter in Pretoria. Sy en haar man is reeds vroeg in die 1990’s van mekaar vervreem. “Ek weet nie waar hy homself bevind nie.” Sy het nog nie elektrisiteit in haar kamer nie en moet krag met ’n verlengingsdraad van die gang kry. Foto: Nelius Rademan

Elizabeth Moroosi (77) woon in ’n kamer met ’n kombuisie en badkamer. Haar man is vyf jaar gelede dood. Sy is ’n diabeet en loop swaar vandat sy geval en haar been seergemaak het. Die huur is al weer opgesit, kla sy. “Hulle maak ons dood (met die stygings), weet jy.”

Boet Rudolph (64) bly dekades al in Jan Hofmeyr. “Eers het ons probleme gehad met inbrake. Toe kry ek vir my die groot hond en die klein hondjies, en nou is dit bietjie stiller.”

Kathrina Ralph se kleinkinders speel in haar voortuin. Voor staan Jana (3). Die gebied is nie meer veilig nie, sê Ralph. “Die polisie patrolleer darem nou gereeld, maar as jy hulle bel, is hulle baie stadig.”

Frances Venter (20) help ’n buurvrou om haar voortuin skoon te maak in Gousblomstraat. Inwoners kla hul buurt het met die jare al hoe meer vervalle geword.

Paul Rudolph (regs voor) staan buite sy broer se huis in Gousblomstraat in Jan Hofmeyr, Johannesburg. Jannie van Niekerk leun teen die motor en Lukas van Niekerk staan agter die deur.

Petro Rich (23), Lourens de Lange (22) en Chrisjan Havenga (23) is drie van Jan Hofmeyr se jonger inwoners. “Dis oukei,” sê Lourens. “Jy kan nie meer alleen loop nie, hier’s dronk mense. Maar dis lekker om hier te bly.” Petro voeg by: “Dis nog nie so bad nie.”

‘Op die oomblik is daar nie ’n toekoms nie.

Maar ek sê dankie in die oggend en ek sê dankie in die aand.”

Dít was die woorde van Alet Parsons (61) van Jan Hofmeyr drie dae nadat sy in haar huurkamer in munisipale behuising ingetrek het.

Die pensioentrekkers wat hier woon, sê die plek het die laaste paar jaar verander. Daar is oral misdaad en dwelms.

Die meeste van die huise is verwaarloos, met lae baksteenmure of doringdraad wat die erwe omhein. By elke huis waar Beeld aangeklop het, was daar minstens een hond.

Ella Rudolph (51) woon al langer as 40 jaar in Vrededorp.

“Dit was baie nice toe ek grootgeword het. Ons kan nie meer in die straat loop nie. Ek kan nie ná ses winkel toe gaan nie, want hulle wag vir jou op die hoek.
“Hulle het al drie fone van my geneem.”

Vol asblikke staan in Gousblomstraat en die reuk van verrotting hang swaar in die lug.

Hierdie vullis moes al die vorige dag verwyder gewees het, sê Nico Hattingh, wat by die Jan Hofmeyr-gemeenskapsprojek betrokke is.

Dit gebeur dikwels dat dit nie verwyder word nie, voeg Rudolph by.

“Jy moet die asblik net so vuil inbring, anders steel hulle hom. Dit was altyd baie skoon hier.”

Sylvia Patrick (50) woon die afgelope 23 jaar in Fietas.

“Dit was altyd stil hier. Jy kon laataand in die strate loop en jou deure ooplos. Nou is hier meer dwelms en sjebiens.

“Ons leef nou ’n lewe van vrees.”

Osman Cassiem van die DA is die nuutverkose raadslid vir wyk 58, waaronder Vrededorp, Pageview, Fordsburg en Mayfair onder meer val.

Hy beoog om misdaad te probeer bekamp deur saam met die polisie te werk om patrollies meer sigbaar te maak.

Hy is bewus van die probleme met die vullisverwydering, sê hy.

“Ek probeer op hul rug sit om my wyk skoon te hou. Dié wyk is die afgelope 18 jaar afgeskeep.

“Die mense verdien beter dienslewering as wat hulle tans kry.”

Bron – ‘Dis nou anders’